بازتاب نیوز

اريايي: د ټاکنو په قانون کې تعديل د کمېسيونونو په چارو کې لاسوهنې ته لاره پرانيسته

٥ غويی ١٣٩٨ د كليد ګروپ

د ټاكنيزو شكايتونو د كمېسيون پخوانى رئيس وايي، د ټاكنو په قانون كې تعديل د ټاكنيزو كمېسيونونو د كمزورۍ لامل شو او د دغه كمېسيونونو په چارو كې د لاسوهنو لپاره يې هم لاره خلاصه كړه.

عبدالعزيزآريايي چې دوسيه يې د دغه كمېسيون او ټاكنو د كمېسيون له نورو كمېشنرانو سره يو ځاى په لويه څارنوالۍ كې ترڅېړنو لاندې ده، له كليد سره په ځانګړې مركه كې وويل، د قانون تعديل د ټاكنيزو شكايتونو د كمېسيون په چارو كې د حكومت، محكمې او څارنوالۍ لاسوهنو ته لاره هواره كړه.

آريايي زياته كړه، د ټاكنيزو جرمونو څېړنه او له څېړلو وروسته څارنوالۍ ته د دوسيو لېږل د ټاكنيزو شكايتونو د كمېسيون واك دى خو په وينا يې اوس جمهوري رياست او اجرائيه رياست په فرمايشي توګه دغه دوسيې څارنوالۍ ته لېږلې دي.

د ټاكنيزو شكايتونو د كمېسيون پخواني رئيس په ورته وخت كې زياته كړه، د حكومت مشرتابه، ځينو نورو حكومتي بنسټونو، يو شمېر بهرنيو كړيو، ځينو سياسي ګوندونو او مدني ټولنو له دې كبله چې د خوښې وړ كسانو يې وروستي لېست ته لاره پيدا نه كړه نو د ټاكنو په ګډوډولو يې لاس پورې كړ.

د ټاكنيزو شكايتونو د كمېسيون پخوانى رئيس عبدالعزيز آريايي په همدې حال كې وايي، څوڅو ځله څارنوالۍ ته ورغلى خو په اړه يې هېڅ اسناد نه شته او يوازې ترې د دې پوښتنې كيږي چې ولې فلانى نوماند بريالى نه شو.

نوموړي زياته كړه، د اسنادو پربنسټ د رايو باطلول يا باطلو رايو ته اعتبار وركول يې له واكونو څخه وو چې په اړه يې د اسنادو په پام كې نيولو سره پرېكړې كړې او اوس هم په خپلو پرېكړو ولاړ دى.

خو د جمهوري رياست مرستيال وياند شاه حسين مرتضوي د دغه تورونو په ځواب كې كليد ته وويل، د ټاكنيزو كمېسيونونو د غړو دوسيې اوسمهال په لويه څارنوالۍ كې دي او زياته يې كړه چې كه د ټاكنيزو كمېسيونونو غړي د حكومت اويا بل هر بنسټ په اړه اسناد لري نو وړاندې يې دې كړي.

غوښتل مو چې د يادو تورونو په اړه د ټاكنيزو شكايتونو د كمېسيون او اجرائيه رياست نظر هم ولرو خو له هڅو سره سره ونه توانېدو.

د تېر كال د تلې مياشتې په وروستيو كې د ولسي جرګې ټاكنې ترسره شوې چې په يادو ټاكنو كې د پراخو درغليو او په پايلو كې يې د لاسوهنو ادعاوې وشوې، چې له دغه ادعاو وروسته حكومت د دواړو كمېسيونونو ټول غړي په يو ځل له دندو ګوښه او څارنوالۍ ته يې ور وپيژندل.

 

The post اريايي: د ټاکنو په قانون کې تعديل د کمېسيونونو په چارو کې لاسوهنې ته لاره پرانيسته appeared first on pashto.

اصلي اړیکې: https://tkg.af/pashto/2019/04/25/%D8%A7%D8%B1%D9%8A%D8%A7%D9%8A%D9%8A-%D8%AF-%D9%BC%D8%A7%DA%A9%D9%86%D9%88-%D9%BE%D9%87-%D9%82%D8%A7%D9%86%D9%88%D9%86-%DA%A9%DB%90-%D8%AA%D8%B9%D8%AF%D9%8A%D9%84-%D8%AF-%DA%A9%D9%85%DB%90%D8%B3/

د اصلي پاڼې خلاصول

د كليد ګروپ په اړه نور ولولئ

وروستي خبرونه:

Loading