بازتاب نیوز

په نمبر پلیټ ناول لنډه تبصره

٢٦ غويی ١٣٩٨ ټاټوبی نيوز

د افغاني ټولنې د شته حالاتو د بدلولو او د نجات لار په علم او د جهل په ختمېدو کې ده، او پدې لار کې باید ټولې هغه هڅې تایید او تشویق شي چې یو قدم هم مونږ د پورته هدف خواته نژدې کوي. زمونږ ټولنه تر بل هر څه نن ورځ علمي بډاینې ته اړتیا لري او د علمي بډاینې لپاره اړینه ده چې مونږ علمي کدرونه او علمي آثار ولرو، چه د همدې علمي کدرونو او علمي آثارو په واسطه بیا مونږ کولای شو چې هرې ډلې او د هر فکر خاوند ته سمه لاره وښایو. چېرته چه تیاریکي ورځ تر بلې په افغاني ټولنې خپل څادر غوړوي، بل لور ته هملته په دې ټولنه کې داسې وګړي هم موجود دي شته، چه د تیاریکۍ څادر له پیڅکې نیسي او پر ځای یې د علم او روښنایۍ څادر غوړول غواړي. د ناول لوستل معمولاً د دې لپاره ښه وي چه تر لوستلو وروسته باید په جدیت، عزم او نوې روحیې بېرته خپل ژوند ته راوګرځې. د اسلامي نړۍ نوموتی عرب لیکوال دوکتور عایض القرني په خپل کتاب د بریا تمځای کې وایي:

“کله چه دې د قرانکریم یوه برخه په تدبر سره ولوسته، د شعر، آدب او کیسو یوه برخه در سره هم ولوله چه ذهن دې وغوړیږي، دا ډول دمه د دې لپاره هم ښه ده چه تر ستړیا وروسته ژوند ته بېرته په جدیت، عزم او نوې روحیې ور وګرځې، دا کار تجربه کړه او وګوره چه څومره سکون او تازګي در بخښي.”

ناول د کیسې په جامه کې یو داسې صفت او ژانر دی، چه د ټولنې په سمون کې یې مثبت رول لوبولی او ټولنه یې پرته له کومې شخړې یا جګړې د اصلاح پر لور بيولې ده. یا ناول د ادب یو ژانر دی او ادب د هر څه د مخه د انسان د ژوند او ژبې سره نه شلېدونکې اړیکي لري، پښتو ادب ته ناول د نولسمې پېړۍ په وروستیو کلونو کې له انګریزي ژبې څخه د اردو ژبې پر لار راغلی دی، په دې لړ کې د اردو ژبې څخه د ډپټي نذیر احمد د لیکلو ناولونو (مراة العروس او توبة النصوح) پښتو ژباړې د یادونې وړ دي، چه لومړی میاحسیب ګل کاکاخېل د(نقش نګین)پنوم او دویم یې میا محمد یوسف په(۱۹۰۵م) کال کې ژباړلي دي.

دا چه خبرې رانه اوږدې نشي، راځو د نمبر پلیټ ناول په اړه غږیږو:

نمبر پلیټ ناول د ځوان او نوښتګر لیکوال ښاغلي انجنیر طارق تسل صیب هغه اثر دی چې د دې اثر د لوستلو نه وروسته، دغې جالب او جاذب اثر دېته ته اړ کړم چه په یاد اثر باندې يو څو کرښې تورې کړم.

ـــ دا چه کیسه باید په داسې انداز کې ولیکل شي چه تلوسه پکې پرته وي تر څو لوستوونکی له ځانه سره تر پایه وساتي او دېته یې پرېنږدي، تر څو چه کیسه پای ته نه وي رسېدلي لوستوونکی دی کیسه په نیمایي کې نامکمله پرېږدي او د کیسې په مفهوم له اوله پوه شي. خوشبختانه چه د نمبرپلیټ ناول په داسې انداز کې لیکل شوی دی لکه په تار کې چه مرغلرې وپېیي.

ـــ کیسه کې باید ستر او پر مفهومه پیغام پروت وي، تر څو لوستوونکي یې د لوستلو څخه وروسته په ځان کې د مثبت بدلون احساس وکړي؛ او هغه کړنې چه منفي اړخ لري له هغو څخه ځان وژغوري، او کومې کړنې چه مثبت اړخ لري دې ډول کړنو ته باید لېواله و اوسې.

ـــ اکثره وخت یو لیکوال کیسه ولیکي، ولې د کیسې تلوسه تر پایه نشي ساتلی او غوټه ترې ډېر ژر پرانېستل کیږي، په نمبر پلیټ ناول کې لیکوال تر ډېره هڅه کړې چه تلوسه تر پایه وساتي او غوټه ژر خلاصه نکړي بلکې د ناول په پای کې د غوټې د پرانستلو کوښښ یې کړی چه دا د ناول یوه ښه ځانګړنه ده.

ـــ د ناول له پیل نه تر پایه پورې ښه او په زړه پورې صحنه سازي شوې ده؛ او دا ښه صحنه سازي د دې څرګندویې کوي چه د لوستونکو په اذهانو کې کیسه تل په ښه شکل سره پاتې شي.

ـــ په یاد ناول کې تر ډېره حده کوښښ شوی چه کیسه سانسوره پاتې شي، او د لوستوونکي تلوسه لا پسې زیاته شي، تر څو ناول په صحیح ډول تر پایه ولولي.

ـــ د ناول کردارونه او کرکټرونه په ښه انداز سره تر سره شوي دي؛ هر ځای کې خپل کردار او کرکټر په ښه توګه ځای په ځای شوی او په منظمه توګه سره اداء شوي دي، چه دغه منظموالي یې ناول ته ښکلا بخښلې ده.

ـــ د ناول تر ټولو عمده ښه والی دادی چه، د ناول موضوع د موجوده عصر موضوع ده او دا ډېره ښه په دې ده، چه په اوسني عصر کې ډېری داسې پېښې کېدونکي دي او شوي، نو دا چه موضوع د نن عصر سره برابره ده نو د نن عصر هر وګړی که له یادې موضوع څخه ځان په پوره معنا خبر کاندي، نو د هغه ستونزو سره به لاس او ګریوان نشي له کومو ستونزو سره چه ډېری وګړي لاس او ګریوان دي.

ـــ کیسه یې روانه، فصیحه او عام فهمه ده، لوستونکی په کیسه باندظط په صحیح توګه پوهیږي، مطلب ترې ښه اخیستلای شي، او سر یې پرې ژر خلاصیږي.

.

ـــ سره د دې چه نمبر پلیټ ناول ډېری ښه والی لري خو د ښه والي تر څنګ، د یاد کتاب په ځینو ځایونو کې ټایپي غلطيانې موجودې دي، دا ځکه چه انسان عاجز دی نو حتماً اشتباه ترې کېدونکې ده، یواځینی کتاب چه معتر او اوچت کتاب دی، او د هر قِسمه نېمګړتیاوو او اشتباهاتو څخه خالي او منزه دی، هغه د الله تعالی کلام (قران عظیم الشان) دی، ځکه چه الله تعالی په خپله فرمایلي:

ذٰلِكَ الْكِتٰبُ لَا رَيْبَ ۛ فِيهِ ۛ .َ

ژباړه: دا د ( الله) کتاب دی، په ده کې هیڅ شک نشته.

په دې هيله چه په آینده چاپ کې یادې ټایپي غلطۍ اصلاح شي.

په پای کې د نمبرپلیټ ناول لیکوال ښاغلي انجنیر طارق تسل صیب ته د زړه له کومې د یاد کتاب د چاپ مبارکي وایم، او د منتقم ذات څخه ورته د اوږد عمر(نېک عمل لپاره)غوښتونکی یم.

د تسل صیب د لا پنځونو په هیله.

په درنښت.

په ټوله اسلامي مینه.

سیدحبیب الله سمسور.

جلال کوټ، خپله جونګړه.

۱۳۹۸هجري لمریز کال.))

The post په نمبر پلیټ ناول لنډه تبصره appeared first on ټاټوبی نيوز.

اصلي اړیکې: https://tatobaynews.com/په-نمبر-پلیټ-ناول-لنډه-تبصره/

د اصلي پاڼې خلاصول

ټاټوبی نيوز په اړه نور ولولئ

وروستي خبرونه:

Loading