بازتاب نیوز

تاجیکستان هشتاد زندانی افغان را بر می‌گرداند

٢٧ ثور ١٣٩٨ روزنامه هشت صبح

۸صبح، کابل: امام علی رحمان، رییس جمهور تاجیکستان، گفته است که به زودی ۸۰ نفر از زندانیان افغان را که در این کشور در بند به سر می‌برند، به افغانستان انتقال خواهند داد.

آقای رحمان این سخنان را در دیدار با صلاح‌الدین ربانی، سرپرست وزارت امور خارجه کشور، مطرح کرده است. وزارت امور خارجه روز جمعه، بیست‌وهفتم ثور در خبرنامه‌ای گفته است که درخواست استرداد ۸۰ زندانی افغانستان از تاجیکستان از سوی صلاح‌الدین ربانی، سرپرست این وزارت، مطرح و از سوی رییس جمهور تاجیکستان پذیرفته شده است.  

به نقل از خبرنامه، امام علی رحمان به سرپرست وزارت امور خارجه کشور اطمینان داده است که ۸۰ نفر از زندانیان افغان به زودی به افغانستان انتقال خواهند شد.

هرچند تاکنون روشن نیست که چه تعداد از شهروندان افغانستان در تاجیکستان زندانی‌اند، اما پیش از این نیز شماری از زندانیان افغان از تاجیکستان به کشور انتقال یافته‌اند. تاجیکستان در همسایه‌گی افغانستان قرار دارد و با چند ولایت کشور هم‌مرز است.  

وزارت امور خارجه هم‌چنان گفته است که دو طرف در این دیدار روی موضوعات امنیتی، اقتصادی و پروژه‌های انکشافی بحث کرده‌اند. امام علی رحمان در بخش همکاری‌های اقتصادی و پروژه‌های انکشافی گفته است که کار بند راغون در یک سال آینده تکمیل می‌شود و افغانستان از برق این بند بهره‌مند خواهد شد.

بند راغون از پروژه‌های کلان اقتصادی تاجیکستان است. انتظار می‎رود که تاجیکستان از این نیروگاه برق آبی، به افغانستان و پاکستان برق صادر کند.  

لینک اصلی: https://8am.af/tajikistan-returns-80-afghan-prisoners/

بازکردن لینک اصلی

بیشتر بخوانید از روزنامه هشت صبح

آخرین خبر ها:

Loading