بازتاب نیوز

د ولسي جرګې دوه برحاله غړي چې پر بند محکوم دي وکالت کوي

٢٨ غويی ١٣٩٨ طلوع نیوز

د ولسي جرګې یو شمېر غړي وايي چې د ولسي جرګې د اوولسمې دورې دوه غړي چې د محکمې لخوا په بند محکوم شوي، د محکمې حکم نه دی پرې عملي شوی او په ولسي جرګه کې یې کار پیل کړی دی.

د دغو استازو په وینا، میرزامحمد کټوازی چې د ۱۳۸۴ کال د وږي په څلورمه نېټه د کابل ښار د لومړۍ حوزې د لومړنۍ محکمې لخوا په غیابي توګه د اسنادو د جعل او تزویر په جرم په پنځه کاله بند محکوم شوی و.

د ملي دفاع وزارت د روغتیا د برخې پخوانی رییس احمد ضیایفتلي هم یوه اوونۍ مخکې د یکشنبې په ورځ (د غوايي په ۲۲مه) د فساد په تور د عدلي او قضايي مرکز د محکمې له لوري په غیابي توګه په شپږ میاشتې بند محکوم شو.

د استېناف محکمې د حکم له صادرېدو وروسته اوه تنه نور چې په دغې دوسیه کې مجرم پېژندل شوي وو زندان ته ولېږدول شول، خو احمد ضیا یفتلي له دوه تنو نورو سره د محاکمې په ورځ حضور نه‎درلود.

د ولسي جرګې د اوولسمې دورې پر دغو دوو غړو د محکمې حکم تراوسه نه دی عملي شوی.

د ولسي جرګې غړی الله ګل مجاهد په دې اړه وايي:«هغه څه چې قضا پرېکړه وکړي موږ د افغانستان قضا ته، د افغانستان سترې محکمې ته احترام ولرو. که‎چېرې قضا پر ما هم حکم وکړي، که‎چېرې زه په یوه جرم تورن وم پر ما څوک حکم کوي؟ قضا!»

د ولسي جرګې غړی رمضان بشردوست هم وویل:«زموږ عدلي اوقضايي بنسټونه، د سترې محکمې رییس، د سترې محکمې غړي، لویه څارنوالۍ په دقیقه توګه د دوی دي، دوی هغوی ته رایه ورکوي، دوی د هغوی ملاتړ کوي.»

ځينې حقوق پوهان هم د محکمې د حکمونو پر عملي کېدو ټینګار کوي.

حقوق پوه ارش شهیرپور په دې اړه څرګنده کړه:«هېڅوک تر قانون هغې خوا نه دي. حتا وکیل! د افغانستان د اساسي قانون په ۱۰۲ ماده کې په څرګنده او روښانه جزايي مسوولیتونه یې راغلي دي؛ هر کله چې د ولسي جرګې له غړو یو غړی د کوم جرم لامل کېږي، جرم یې مشهود وي، بالفعل نیول کېږي او ازادي ترې اخیستل کېږي.»

د لویې څارنوالۍ او کورنیو چارو وزارت ویندویان وايي کله چې په رسمي توګه د محکمې حکم دوی ته ورسېږي د قانون پر بنسټ به یې عملي کړي.

ښاغلي کټوازي له دې مخکې د محکمې حکم پای ته رسېدلی بللی و او د احمد ضیا یفتلي مدافع وکیل د خپل موکل په وړاندې د محکمې حکم ظالمانه او یوه دسیسه بولي.

اصلي اړیکې: https://www.tolonews.com/pa/elections-2019/%D8%AF-%D9%88%D9%84%D8%B3%D9%8A-%D8%AC%D8%B1%DA%AB%DB%90-%D8%AF%D9%88%D9%87-%D8%A8%D8%B1%D8%AD%D8%A7%D9%84%D9%87-%D8%BA%DA%93%D9%8A-%DA%86%DB%90-%D9%BE%D8%B1-%D8%B2%D9%86%D8%AF%D8%A7%D9%86-%D9%85%D8%AD%DA%A9%D9%88%D9%85-%D8%AF%D9%8A-%D9%88%DA%A9%D8%A7%D9%84%D8%AA-%DA%A9%D9%88%D9%8A

د اصلي پاڼې خلاصول

طلوع نیوز په اړه نور ولولئ

وروستي خبرونه:

Loading