بازتاب نیوز

د کریک سازمان افغانستان کې د پروژو لپاره ۴،۵ مېلیارد ډالر لګولي

٢٧ غويی ١٣٩٨ طلوع نیوز

 

د اسیا د پراختیایي بانګ مسوولین له طلوع نیوز سره په خبرو کې وايي د مرکزي اسیا د سیمه‎يیزو همکاریو په سازمان یا کریک کې د افغانستان د غړیتوب له پیل راهیسې د دې سازمان څلورنیم مېلیارد ډالر مرسته په هغو پروژو کې لګول شوې چې افغانستان په‎کې شامل دی.

دوی زیاتوي د دغو پيسو ډېره برخه د اسیا پراختیایي بانک ورکړې ده.

د لوېدیځې او مرکزي اسیا په چارو کې د اسیا پراختیايي بانګ د سیمه‎يیزو همکاریو د برخې مسوول سفر پرویز په دې اړه وویل:«د مرکزي آسیا د سیمه ایزو همکاریو سازمان چې یوولس غړي لري د سیمه ییز اقتصاد د ودې په موخه د څو اړخیزو فرصتونو د تنظیم لپاره جوړ شوی ترڅو هیوادونه په ګډه پر سیمه ییزو پروژو کار وکړي او په دې برخه کې افغانستان هم ډېره ګټه پورته کړې ده.»

د اسیا پراختیايي بانک مسوولین وايي هغه پروژې چې تراوسه د مرکزي اسیا د سیمه‎يیزو همکاریو پروګرام په چوکاټ کې عملي شوې په غړو هېوادونو او افغانستان کې د ترانسپورت، د وارداتي برېښنا د لېږد او سوداګریزو اسانتیاوو د برابرولو په برخو کې دي.

له بلخوا د اقتصادي چارو یو شمېر کارپوهان په هېوادونو کې د بیخ بنسټونو لپاره د اسیا د پراختیايي بانک د مرستو لګول ګټور بولي.

افغانستان په ۲۰۰۵ز کال کې د مرکزي اسیا د سیمه‎يیزو همکاریو سازمان یا کریک غړیتوب ترلاسه کړ.

په اوسني وخت کې دغه سازمان د افغانستان په ګډون یوولس غړي لري. 

اصلي اړیکې: https://www.tolonews.com/pa/business/%D8%AF-%DA%A9%D8%B1%DB%8C%DA%A9-%D8%B3%D8%A7%D8%B2%D9%85%D8%A7%D9%86-%D8%A7%D9%81%D8%BA%D8%A7%D9%86%D8%B3%D8%AA%D8%A7%D9%86-%DA%A9%DB%90-%D8%AF-%D9%BE%D8%B1%D9%88%DA%98%D9%88-%D9%84%D9%BE%D8%A7%D8%B1%D9%87-%DB%B1%DB%B4-%D9%85%DB%90%D9%84%DB%8C%D8%A7%D8%B1%D8%AF-%DA%89%D8%A7%D9%84%D8%B1-%D9%84%DA%AB%D9%88%D9%84%D9%8A

د اصلي پاڼې خلاصول

طلوع نیوز په اړه نور ولولئ

وروستي خبرونه:

Loading