بازتاب نیوز

شپني عملیات؛ کابو ۵۰ تنه له طالبانو سره د همکارۍ په تور نیول شوي

٢٢ چنګاښ ١٣٩٨ طلوع نیوز

 

د ملي امنیت ځواکونو په کابل، هلمند او کندهار ولایتونو کې په څو جلا عملیاتو کې کابو پنځوس تنه په ترهګریزو فعالیتونو کې د لاس لرلو او طالبانو سره د همکارۍ په تور نیولي دي.

د ملي امنیت عمومي ریاست وايي چې ډېری دغه کسان په دغو ولایتونو کې په شپنیو عملیاتو کې نیول شوي دي.

له دې ډلې یو شمېر دغه کسان تېره شپه(جمعه د چنګاش په ۲۱مه) د کابل ولایت د ده سبز ولسوالۍ په بختیارانو کلي کې نیول شوي دي.

په ورته وخت کې د کندهار ولایت چارواکي هم وايي چې څه باندې څلوېښت تنه دغه کسان هغه وخت د ملي امنیت ځواکونو لومې ته ولوېدل چې غوښتل یې د ډیورنډ کرښې له هغې غاړې، کندهار او هلمند ته راشي.

د کندهار والي حیات‎الله حیات په دې اړه وویل:«د دغې څلوېښت کسیزې دلې په منځ کې د بېلابېلو ولایتونو کسان - کندهار، ارزګان، هلمند، زابل، عزني، بادغیس، هرات، جوزجان، پکتیا او میدان وردګو کسان اوسېدونکي شامل دياو دغو کسانو په لومړنیو څېړنو کې په ترسره شویو جرمونو یې اعتراف کړی او د قانون منګولو ته سپارل شوي دي.»

د کندهار د ملي امنیت رییس جنرال برکت الله څمکنی وايي:«موږ داسې کسان نیولي چې اصلاً د کندهار په جګړې پورې تړاو نه‎لري. مثلاً داسې کس دی چې وايي زه په بلخ کې د طالبانو د استخباراتو د مسوول مرستیال یم، چې اصلاً زموږ په ذهن کې نه وو، یوازې موږ ته اطلاع راکړل شوې وه چې ویجاړونکی کس در روان دی.»

هېوادوال، د ترهګرو او طالبانو د نیولو لپاره د شپنیو عملیاتو د ترسراوي ستاینه کوي.

د کابل د ده سبز ولسوالۍ د بختیارانو د کلي اوسېدونکی ذبیح الله وویل:«موږ له خپلو امنیتي ځواکونو سره همکار یوو. او موږ د هغوی فعالیتونه ستایوو؛ د دې لپاره چې د امنیتي ځواکونو د زحمتونو پایله ده چې موږ سوکاله یوو.»

د کندهار اوسېدونکی غلام رضا هم وايي:«له عدلي او قضايي بنسټونو څخه زموږ غوښتنه دا ده چې د افغانستان د قانون په مطابق له ځانګړي جدیت او صداقت سره خپله دنده ترسره کړي، په پیسو، بډو او واسطې په سې دې نه ګرځي. او باید هڅه وکړي هغه څه چې د افغانستان په جزايي قانون کې ذکر شويو باید د خلکو لپاره دې پر ترهګرو دې عملي کړي.»

په روانه یوه میاشت نژدي ۸۰ تنه طالبان په کندهار ولایت کې د امنیتي ځواکونو له لوري هغه مهال نیول شوي چې له پاکستانه هېواد په لور روان وو، خو بیا هم د دغه ولایت په یو شمېر ولسوالی کې وسله‎والو طالبانو خپل بریدونه دوامداره ساتلي.

اصلي اړیکې: https://www.tolonews.com/index.php/pa/afghanistan/%D8%B4%D9%BE%D9%86%D9%8A-%D8%B9%D9%85%D9%84%DB%8C%D8%A7%D8%AA%D8%9B%C2%A0%DA%A9%D8%A7%D8%A8%D9%88-%DB%B5%DB%B0-%D8%AA%D9%86%D9%87-%D9%84%D9%87-%D8%B7%D8%A7%D9%84%D8%A8%D8%A7%D9%86%D9%88-%D8%B3%D8%B1%D9%87-%D8%AF-%D9%87%D9%85%DA%A9%D8%A7%D8%B1%DB%8D-%D9%BE%D9%87-%D8%AA%D9%88%D8%B1-%D9%86%DB%8C%D9%88%D9%84-%D8%B4%D9%88%D9%8A

د اصلي پاڼې خلاصول

طلوع نیوز په اړه نور ولولئ

وروستي خبرونه:

Loading