بازتاب نیوز

خوستیو مېرمنو د اختریز ټیکري په غونډه کې د جګړې درېدو غوښتنه وکړه

٢٣ زمری ١٣٩٨ د كليد ګروپ

په خوست کې مېرمنو د سولې اختریز ټیکړي تر سرلیک لاندې غونډه کې د روانې جګړې د ودریدو غوښتنه وکړه.

په دغه فرهنګي غونډه کې مېرمنو په يو غږ په هېواد کې د روانې جګړې درېدلو غوښتنه وکړه.

دغو مېرمنو، چې شمېر يې نېږدې ۲۰۰ ته رسيده، د قطر په دوحه کې د افغان سولې په تړاو روانو خبرو ته هیله څرګنده کړه، خو غوښتنه یې دا وه چې په دغو خبرو کې د افغان ښځو پرحقونو معامه ونه شي.

د دغه فرهنګي پروګرام يوې ګډونوالې محبوبې لعل افغان خپلو خبرو کې وويل، په روانه جګړه کې افغان ميندو د بل هر قشر په پرتله ډېره قرباني ورکړې او له هغوی يې مېړونه، وروڼه او ځوان زامن واخيستل.

د محبوبې په خبره روانې جګړې افغان ماشومان بې سرپرسته کړل او د یوې مړۍ ډوډۍ لپاره له زده کړو پاتې او کار ته یې ملاوې تړلي.

د سهيلا نوري په نوم د دغې فرهنګي غونډې بلې ګډونوالې خپلو خبرو کې وويل، په هېواد کې روانه شخړه په جګړه او وينه تويونه نه حل کېږي.

د هغې په وينا له دغه بحران څخه د ژغورل کېدو يوازنۍ لاره سوله او خبرې اترې دي، خو په خبره یې پکارده چې د ښځو ونډه له پامله ونه غورځوله شي.

په ورته مهال د خوست والي محمد حليم فدايي بيا دغې غونډې ته وويل، هغه سوله چې د افغان مېرمنو حقوق نه وي په کې خوندي، دوی ته د منلو وړ نه ده.

والي وویل، دوی د داسې سولې پلوي کوي چې له افغان حکومت سره وي او د افغان حکومت په رهبرۍ باندې مخ ته وړل کیږي.

ښاغلي فدایي دغه راز وويل چې افغان خويندو د پخوا په پرتله ډېر پرمختګ کړی او په هره برخه کې يې لاسته راوړنې درلودلي، نو دوی نه غواړي چې د سولې روانو خبرو په ترڅ کې دې یادې لاسته راوړنې ترپښو لاندې شي.

The post خوستیو مېرمنو د اختریز ټیکري په غونډه کې د جګړې درېدو غوښتنه وکړه appeared first on pashto.

اصلي اړیکې: https://tkg.af/pashto/2019/08/14/%D8%AE%D9%88%D8%B3%D8%AA%DB%8C%D9%88-%D9%85%DB%90%D8%B1%D9%85%D9%86%D9%88-%D8%AF-%D8%A7%D8%AE%D8%AA%D8%B1%DB%8C%D8%B2-%D9%BC%DB%8C%DA%A9%D8%B1%D9%8A-%D9%BE%D9%87-%D8%BA%D9%88%D9%86%DA%89%D9%87-%DA%A9/

د اصلي پاڼې خلاصول

د كليد ګروپ په اړه نور ولولئ

وروستي خبرونه:

Loading