بازتاب نیوز

کونړ: د طالبانو په عملیاتو کې داعش ځپل شوي

٢٤ زمری ١٣٩٨ نن ټکی اسیا

نن ټکی اسیا (جمعه، ۲۵ زمری، ۱۳۹۸ل): له څه مودې راهیسې طالبانو د کونړ ولایت په هغو سیمو کې چې داعش تر کنټرول لاندي دي، پراخ عملیات پيل کړي چې په ترڅ کې یې د ځايي اوسیدونکو په وینا اوس په دغه ولایت کې د داعش قوت ورځ په ورځ کمیږي.

د کونړ څخه د طالبانو یوې سرچینې نن ټکی اسیا ته وویل چې نن ورځ هم په دغه ولایت کې پراخ عملیات تر سره شول چې په ترڅ کې د نورګل ولسوالۍ اړوند سهیل تنګی، میجګل او کلينګل تنګی طالبانو نیولی.

د طالبانو سرچینې وايي چې په دغه جګړه کې ۵ داعشیان وژل شوي، ۳ ټپيان او لس کسان یې تسلیم شوي دي.

نن ټکی اسیا ته د ځینو نیول شویو داعشیانو نومونه هم رسیدلي چې په لاندي ډول دي:

د ملا سرحد وروڼه: جمل الرحمن او عبدالرحمن. يارجان، حکيم الله، حبيب الرحمن، حاجى عبدالمالک او شيرګل.

سرچینې ویلي چې دوه نور داعش مشران هم د تسلیمۍ لپاره اماده دي او ژر به تسلیم شي.

تر اوسه طالبانو د یاد پرمختګ خبر رسما نه دی ورکړی خو د سیمې څخه د داعش پر خلاف په جګړه بوخت یوه طالب نن ټکی اسیا ته وویل چې دوی د تیرې ورځې په جګړه کې څلور ډاټسن موټر، څلور موټرسایکل او وسلې نیولي دي.

د یادونې وړ ده چې ددې تر مخه طالبانو په سرپل او زابل ولایت کې د داعش پر خلاف لوی عملیات کړي وه چې په ترڅ کې دغه ولایتونه له داعشي جنګیالیو پاک شول خو په ننګرهار او کونړ ولایت کې یې اوس هم پر ضد د طالبانو پراخ عملیات روان دي.

اصلي اړیکې: https://www.nunn.asia/149864/%DA%A9%D9%88%D9%86%DA%93-%D8%AF-%D8%B7%D8%A7%D9%84%D8%A8%D8%A7%D9%86%D9%88-%D9%BE%D9%87-%D8%B9%D9%85%D9%84%DB%8C%D8%A7%D8%AA%D9%88-%DA%A9%DB%90-%D8%AF%D8%A7%D8%B9%D8%B4-%DA%81%D9%BE%D9%84-%D8%B4/

د اصلي پاڼې خلاصول

نن ټکی اسیا په اړه نور ولولئ

وروستي خبرونه:

Loading