بازتاب نیوز

د هېواد په شمال کې د عبدالله عبدالله ټاکنیزې ډلې د پلویانو لاریون

١٢ ليندی ١٣٩٨ طلوع نیوز

د عبدالله عبدالله په مشرۍ د ثبات او همپالنې ټاکنیزې ډلې پلویانو په سرپل او فاریاب ولایتونو کې د ۳۰۰ زره رایو د باطلېدو لپاره چې د هغوی په اند نامعتبرې دي، لاریون وکړ.

هغوی ګواښ وکړ که چېرې له پاکو رایو د ناپاکو رایو د جلا کولو لپاره د دوی غوښتنې ونه منل شي او بې پروايي وشي په لا پراخو لاریونونو به لاس پورې کړي.

یو تن معترض په دې اړه وايي:«موږ ته باید یو پاک مشر راشي، موږ ناپاک مشر نه غواړو.»

یو تن بل معترض هم زیاتوي:«خپله رایه مو استعمال کړه موږ له هغه ملاتړ کوو، باید تقلبي رایې حساب نه کړي.»

دغه اعتراض کوونکي خبرداری ورکوي که له پاکو د ناپاکو رایو د بېلولو په اړه د دوی غوښتنو ته پام ونه شي هېواد به له کړکېچ سره مامخ شي.

د سرپل د ولایتي شورا رییس نور محمد رحماني په دې اړه وویل:«ژر ر ژره دې ۳۰۰ زره تقلبي رایې باید مالومې شي، د ټاکنو د رایو د لوړې ګچې له مالومېدو سره د څارونکو په شتون کې د رایو بیاځلې شمېرنه پيل شې، دا پایله دې د افغانستان خلکو ته اعلان کړي.»

په سرپل ولایت کې هم د عبدالله عبدالله په مشرۍ د ثبات او همپالنې ټاکنیزې ډلې یو شمېر پلویانو لاریونونه وکړل.

د ملي دفاع سرپرست وزیر اسدالله خالد څرګنده کړه:«لاریونونه، مدني حرکتونه د افغانستان د خلکو مسلم حق او موږ هېچا ته نه دي ویلي چې لاریون مه کوئ او یا هم وکړئ، خو هغه مسله چې زموږ د هېوادوالو په امنیت پورې اړه لري او د افغانستان په هره برخه کې چې وي، موږ هغه ته ژمن یوو چې د هېوادوالو امنیت تامین کړو.»

له کابل وروسته په تېرو څو ورځو کې په یو شمېر نورو ولایتونو کې هم د ثبات او همپالڼې ټاکنیزې ډلې د پلویانو لاریونونه وشول.

اصلي اړیکې: https://tolonews.com/index.php/pa/elections-2019/د-هېواد شمال-کې-د-عبدالله-عبدالله-ټاکنیزې-ډلې-د-پلویانو-اعتراضونه

د اصلي پاڼې خلاصول

طلوع نیوز په اړه نور ولولئ

وروستي خبرونه:

Loading