بازتاب نیوز

پروان کې يوه ۱۸ کلن هلک پر ۵ کلنې ماشومې جنسي تېری کړی

٢٦ مرغومی ١٣٩٨ سلام وطندار

پروان کې يو شمېر حکومتي سرچينې وايي، يوه ۱۸ کلن هلک پر يوې ۵ کلنې ماشومې جنسي تېری کړی دی.

يادو سرچينو سلام‌وطندار ته ويلي، د ياد ولايت د سيدخېلو ولسوالۍ په رضاخېل کلي کې د سې شنبې په ورځ د فرشتې « مستعار نوم» په نوم ماشومه چې مدرسې ته روانه وه، د يادې سيمې د يوه اوسېدونکي له لوري ورباندې جنسي تېری شوی دی.

د پروان ولايت د ښځو چارو رييسه شاه‌جان یزدان‌پرست د ياد خبر په تاييد سره وايي، د دې رياست کارکوونکي د يادې پېښې د څېړلو په موخه سيمې ته تللي؛ خو تر اوسه يې جزيات نه دي ترلاسه کړي.

د ياد ولايت امنيتي مسوولان هم د ياد خبر په تاييد سره وايي، دا پېښه د جدي مياشتې په ۲۴مه نېټه شوې ده.

يوه باوري امنيتي سرچينه چې نه غواړي راپور کې يې نوم خپور شي د دغه هلک د نيول کېدو خبر ورکوي او وايي، ياد هلک په خپل جرم اعتراف هم کړی دی.

همداراز سرچينې وايي چې دا ماشومه د پروان سيمه‌ييز روغتون ته لېږدول شوې ده.

په دې اړه مو د فرشتې د کورنۍ نظر تر لاسه نه شو کړی.

يادې پنځه کلنې ماشومې باندې په داسې مهال جنسي تېری کېږي چې تېره اوونۍ سلام‌وطندار د ښځو پر وړاندې د تاوتريخوالي په اړه بشپړ راپور خپور کړ.

د ياد راپور پر بنسټ تېرو ۵ کلونو کې د پروان د ښځو چارو له ریاست سره د ښځو پر وړاندې د تاوتریخوالي له ۸ زره ډېرې پېښې ثبت شوې دي.

په دې تړاو:

يوه ښار کې د تاوتريخوالي ۸ زره پېښې؛ پر شکريې، عايشې او پريسا څه تېر شوي؟

اصلي اړیکې: https://swn.af/pashto/Article.aspx?a=52553

د اصلي پاڼې خلاصول

سلام وطندار په اړه نور ولولئ

وروستي خبرونه:

Loading