بازتاب نیوز

عبدالله عبدالله: سوله لومړيتوب لري؛ خو له فساد ډکې پایلې د منلو وړ نه دي

٧ کب ١٣٩٨ نن ټکی اسیا

نن ټکی اسیا (چهارشنبه، ۷ کب، ۱۳۹۸ل): د ګډ حکومت اجرائيه رییس «عبدالله عبدالله» وایي، سوله ورته لومړیتوب لري؛ خو د ټاکنو له فساد ډکې پایلې د منلو وړ نه دي.

عبدالله عبدالله دغه څرګندونې نن له پخواني ولسمشر «حامد کرزي»، د حزب اسلامي له مشر «ګلبدین حکمتیار»، د بهرنیو چارو له پخواني وزیر «صلاح الدین رباني» او انورالحق احدي سره تر لیدنې وروسته کړې.

عبدالله عبدالله او ورسره سیاسیونو د سولې په برخه کې د امریکا او نړیوالو له هڅو مننه کړې او په خبره یې «د سولې په برخه کې د اورکم روانه طرحه به د طالبانو او امریکا تر منځ د سولې توافقنامې لاسلیک ته زمینه برابره کړي او تمه ده ورپسې بین الافغاني خبرې پیل شي.»

عبدالله زیاته کړې « سوله د افغانستان د خلګو لومړیتوب ده او د ټاکنو تقلبي پایله په هیڅ وجه ورته د منلو وړ نه ده.»

د نوموړي په قول، پرېکړه مو وکړه، چې روان بحران به په بشپړ تدبیر سره حل کوو، تر څو سوله او ټاکنې ترې اغېزمنې نشي.

یاده دې وي، عبدالله عبدالله داسې مهال یو ځل بیا د ټاکنو پایلې ردوي او له سیاسیونو سره د سولې په تړاو غږېږي، چې تمه ده په راتلونکې مارچ میاشت کې بین الافغاني خبرې پیل شي.

ارګ لا هم نه دی توانېدلی، د سولې په برخه کې له سیاسیونو او اجرائيه ریاست سره خپل اختلافات حل کړي او د بین الافغاني خبرو لپاره یو ټولمنلی پلاوی وټاکي.

شریک یې کړئ:

اصلي اړیکې: https://www.nunn.asia/159765/عبدالله-عبدالله-سوله-لومړيتوب-لري؛-خو/

د اصلي پاڼې خلاصول

نن ټکی اسیا په اړه نور ولولئ

وروستي خبرونه:

Loading