بازتاب نیوز

د پخواني اجرائیه ریاست بودیجه نورو ادارو ته لېږدول کېږي

٦ وری ١٣٩٩ بی بی سی

Image caption د پخواني اجرائیه ریاست د ګڼو کارکوونکو برخلیک تر اوسه نه دی مالوم

د افغانستان د ماليې وزارت وايي، د پخواني اجراییه ریاست بودیجه چې څه باندې درې سوه ميلیونه افغانۍ کېږي نورو ادارو ته لېږدوي. د پخواني اجرائیه ریاست چارواکو تر اوسه په دې اړه نظر نه دی ښودلی، خو یو شمېر کارکوونکي یې شکایت کوي چې د دوی معاشونه درول شوي دي.

د افغانستان د ماليې وزارت وايي د اجرائیه ریاست د لغوه کېدو په تړاو د ولسمشر محمد اشرف غني د فرمان له مخې د کب له شلمې وروسته د دغې ادارې کارکوونکي د معاش او امتیاز مستحق نه دي.

د ماليې وزارت د معلوماتو له مخې، پخواني اجرائیه ریاست او د وزیرانو شورا نژدې نهه سوه کارکوونکي لرل او په کال کې نژدې درې سوه ميلیونه افغانۍ بودیجه ورته ځانګړې شوې وه.

د دغه وزارت وياند شمروز خان مسجدي وايي، اوس د دغې ادارې بودیجه نورو ادارو ته لېږدوي، خو د پخوانيو کارکوونکو تنخوا يې د لغوه کېدو د فرمان تر نېټې ورکول کېږي:

خو د اجرائیه ریاست يوه پخواني کارکوونکي د دغې ادارې د کارکوونکو شمېر نږدې دوه زره کسان وښود او ويې ویل چې ځینو يې نږدې له څلورو میاشتو او ځینو نورو يې له دوو میاشتو راهیسې معاش نه دی ترلاسه کړی.

Image caption ولسمشر غني د پخواني اجرائیه ریاست د لغوه کولو فرمان صادر کړی

د دغه ریاست د فرهنګي چارو پخواني سلاکار حبيب الرحمن ابراهيمي وویل لا يې هم د دندې برخلیک روښانه نه دی:

ماليه وزارت وايي له اداري اصلاحاتو کمېسیون او د ولسمشرۍ د چارو ادارې په همکارۍ هڅه کوي چې د دغې ادارې د پخوانیو کارکوونکو برخلیک روښانه کړي.

له بیا بیا هڅو سره سره مو د پخواني اجرائیه ریاست د پخوانیو چارواکو نظر وانخیستلی شو.

خو له دې وړاندې د عبدالله عبدالله دفتر چې د ولسمشرۍ ټاکنو پایلې يې رد کړې وې، د یوې اعلاميې په خپرولو سره د اجرائيه ریاست او لګښتونو په اړه يې د ولسمشر غني ټول فرمانونه او صادر شوي حکمونه بې اعتباره بللي وو.

اصلي اړیکې: https://www.bbc.com/pashto/afghanistan-52030894

د اصلي پاڼې خلاصول

بی بی سی په اړه نور ولولئ

وروستي خبرونه:

Loading