بازتاب نیوز

د کابل عامه کتابتون او په هغه کې په زرګونه کمیابه او ارزښتمن اثار

١٠ چنګاښ ١٣٩٩ طلوع نیوز

د کابل عامه کتابتون په زرګونه کمیابه او ارزښمن کتابونه او اثار په ځان کې زېرمه کړي دي.

دا کتابتون چې څه باندې نیمه پېړۍ لرغونتوب لري، ۱۵۰ زره عنوانه کتابونه او چاپي نشریې لري.

دا کتابتون د کابل د ۲۰۰زره نفوس لپاره جوړ شوی و، او د دغه کتابتون ډېری اثار په تېرو کلونو پورې اړوند دي.

یوازې د دغه کتابتون نوم ډېریو کابل ښاریانو ته اشنا دی؛ خو په دې ښار کې ډېر کم کسان شته چې د دغه کتابتون له کتابونو سره اشنا وي.

د دغه کتابتون په یوې ودانۍ کې چې ۵۸ کاله مخکې جوړه شوې، تر ټولو ارزښتمن کتابونه او نشریې ساتل کېږي.

د کابل په عامه کتابتون کې د ټولنیزو علومو څانګې مسوول امداد الله غیاثي وايي:«موږ په دغه کتابتون کې ډېر ارزښتمن کتابونه لرو، چې د ایران، قزاقستان او تاجکستان په کتابتونونو کې نشته.»

د عامه کتابتون د کتابونو یو بل مسوول محمد ولي آصف هم وايي:«د انند راج فرهنګ کتاب چې په هند کې چاپ شوی، ښايي یو له لومړنیو فارسي - دري فرهنګونو وي چې لرغونتوب یې څه باندې سلو کلونو ته رسېږي.»

د دغه کتابتون تاریخي جلال لا هم پر خپل ځای دی؛ خو هغه څه چې د ځینو لپاره د دغه کتابتون فضا تیاره کړې ده؛ د نوموتي مثنوي پېژندونکي او شاعر حیدري وجودي نشتون دی چې، څو ورځې مخکې ومړ.

هغه د خپل عمر څه باندې ۵۰ کاله په دې کتابتون کې د مثنوي ویلو په برخه کې تېر کړل.

د حیدري وجودي همکار محمد علي رحماني څرګندوي:«استاد حیدري وجودي دلته ځينې زده کوونکي لرل چې د هغوی شعرونه به اصلاح کول او په یوې اوونۍ کې به یې دوه ورځې مثنوي معنوي درس ورکاوه.»

په دې کتابتون کې دغه چوپتیا د کتاب لوستو د اصولو د رعایت لپاره نه دی؛ بلکې د دې ښکارندويي کوي چې ډېر کم خلک دلته راځي.

د کابل د مرکزي عامه کتابتون رییس حمیدالله شهراني وايي:«د دغه کتابتون امکانات په ۵۰ مې لسیزې پورې اړوند دي او سرچینې یې له شپېتمې تر اتیایمې لسیزې له پېر وځي او د کتابتون د ارشیفي توکو یوه برخه ګرځي، له بده مرغه موږ داسې سرچینې لرو چې ډېر ک د استفادې وړ دي چې د مراجعه کوونکو اړتیاوې نه پوره کوي.»

د معیاري کتابتون لرل د یوې ټولنې د علمي سیر ښکارندويي کوي؛ خو په افغانستان یو معیاري کتابتون هم نشته او حکومتونو هم د دغه مهم کلتور په ګټه یوه پاڼه هم نه ده اړولې.

اصلي اړیکې: https://tolonews.com/pa/afghanistan/د-کابل-عامه-کتابتون-او-په-هغه-کې-په-زرګونه-کمیابه-او-ارزښتمن-اثار

د اصلي پاڼې خلاصول

طلوع نیوز په اړه نور ولولئ

وروستي خبرونه:

Loading

Warning: Unknown: write failed: Disk quota exceeded (122) in Unknown on line 0

Warning: Unknown: Failed to write session data (files). Please verify that the current setting of session.save_path is correct (/tmp) in Unknown on line 0