بازتاب نیوز

پاکستاني پوځیانو کونړ کې ۱۴ ملکیانو ته مرګ ژوبله اړولې

٢٦ چنګاښ ١٣٩٩ خبر تلویزیون یک

د کونړ ولایت سرکاڼو ولسوالۍ کې د پاکستاني ځواکونو له لوري د توغندیو برید شوی چې پایله کې یې ۵ تنه ملکي وګړي وژل شوي او ۹ نور ټپیان دي.

دا برید پرون چهارشنبه له غرمې وروسته شاوخوا یوه بجه شوې ده.

د کونړ د ولایتي شورا غړی دین محمد پیلوټ وایي په دې پيښه کې ۸ تنه ولسي وګړي وژل شوي او ۵ نور ټپیان دي.

کونړ کې یوې بلې امنیتي سرچینې د نوم نه ښودلو په شرط یک تلویزیون ته وویل چې دې پيښه کې ۹ تنه ملکیان وژل شوي او ۵ نور ټپیان دي.

افغان امنیتي ځواکونو هم ورته غبرګون ښودلی دی، خو هاخوا مرګ ژوبله نه ده معلومه.

پاکستان کې د افغانستان سفارت هم د یوې اعلامیې په خپرولو سره دا برید غندلی دی.

په اعلامیه کې ویل شوي چې د افغانستان د بهرنیو چارو وزارت د دیپلوماتیکو هڅو په نتیجه کې د پاکستان لوری هوکړه وکړه، ترڅو ډزبند تامین او په سیمه کې د دواړو هیوادونو د پوځي مسؤلینو د بیرق لاندې غونډه جوړه شي.

افغان سفارت همداشان ویلي: "دا ډول بریدونه او د دیورند د فرضي کرښې په اوږدو کې د خپلسرو تاسیساتو رامنځ ته کول چې د دواړو هیوادونو تر منځ د کړکیچ لامل ګرځیدلی شي، په هیڅ وجه د افغانستان اسلامي جمهوريت ته د منلو وړ نه دي."

دا لومړی وار نه دی چې پاکستاني پوځیان پر افغان خاورې توغندي وروي او ملکي خلک په نښه کوي، بلکې هر کال په کراتو د داسې پيښې رپوټونه خپاره شوي دي.

افغان حکومت تر اوسه په دې اړه کوم اغیزمن اقدام نه دی کړی.

اصلي اړیکې: http://www.1tvnews.af/ps/news/afghanistan/42575-2020-07-16-02-23-41

د اصلي پاڼې خلاصول

خبر تلویزیون یک په اړه نور ولولئ

وروستي خبرونه:

Loading