بازتاب نیوز

حکومت په دوو ورځو کې ۳۱۷ طالب بندیان خوشې کړي

١٢ زمری ١٣٩٩ سلام وطندار

د ملي امنیت شورا د ۳۱۷ طالب بندیانو د خوشې کېدو خبر ورکړی دی. د ملي امنیت شورا دفتر په یوه ټویټ کې لیکلي چې یاد بندیان په تېرو دوو ورځو کې له بګرام او ځینو نورو بندخونو نه خوشې شوي دي.

د دغو بندیانو په خوشې کولو سره، د خوشې شویو طالب بندیانو شمېر ۴۹۱۷ ته ورسېده.

د ملي امنیت شورا وايي، دا بهیر به د ۵۱۰۰ طالب بندیانو تر خوشې کولو پورې دوام وکړي.

دغه بندیان په هغه پنځه زره کسیز نوملړ کې شامل نه دي چې د طالبانو له لوري حکومت ته سپارل شوی، بلکې هغه کسان دي چې ولسمشر د اختر په لومړۍ ورځ د هغوی د خوشې کولو فرمان صادر کړ. ولسمشر غني ویلي و چې یاد ۵۰۰ بندیان به د لوی اختر تر څلورمې پورې خوشې شي.

ولسمشر محمداشرف غني د لوی اختر تر لمانځه وروسته په خپله وینا کې وویل چې د پاتې ۴۰۰ طالب بندیانو د خوشې کولو واک نه لري او په اړه یې د پرېکړې لپاره به لویه مشورتي جرګه راوغواړي.

حکومت تر دې مخکې ویلي و چې عدلي او قضايي ادارې پر ۵۹۲ طالب بندیانو ملاحظات لري او خوشې به نه شي، خو اوس دا شمېر ۴۰۰ یادېږي.

طالبانو تېره اوونۍ وویل چې د دولت د زر بندیانو خوشې کولو لړۍ یې بشپړه کړې ده.

په قطر کې د دې ډلې د دفتر ویاند سهیل شاهین ویلي چې له امریکا سره تر هوکړې وروسته یې په درې میاشتو کې د حکومت ۱۰۰۵ بندیان خوشې کړي دي.

د امریکا او طالبانو ترمنځ د سولې هوکړه‌لیک له مخې، ټاکل شوې د دولت او طالبانو ترمنځ د بندیانو تبادلې تر بشپړېدو وروسته بین‌الافغاني خبرې اترې پیل شي.

خو حکومت له طالبانو غواړي چې د بین‌الافغاني خبرواترو د پیل لپاره تاوتریخوالی کم کړي.

اصلي اړیکې: https://swn.af/pashto/Article.aspx?a=56346

د اصلي پاڼې خلاصول

سلام وطندار په اړه نور ولولئ

وروستي خبرونه:

Loading