بازتاب نیوز

لویې مشورتي جرګې د طالب بندیانو خوشې کولو ته مثبته رایه ورکړه

١٨ زمری ١٣٩٩ سلام وطندار

د سولې لویې مشورتي جرګې غړیو د دې جرګې په دویمه ورځ د ۴۰۰ طالب بندیانو د خوشې کولو لپاره مثبته رایه ورکړه.

د دې جرګې مشر عبدالله عبدالله په یوه خبري غونډه کې وویل چې د جرګې ډېری کمېټو د ۴۰۰ طالب بندیانو د خوشې کولو په اړه ویلي چې یاد بندیان دې په ملي او نړیوال ضمانت خوشې شي. ټاکل شوې د دې جرګې وروستۍ پرېکړه سبا اعلان او پرېکړه‌لیک یې هم ولوستل شي.

د لویې مشورتي جرګې غړیو د افغانستان په قضیه کې له ښکېلو لوریو وغوښتل چې د طالبانو له ملاتړه لاس واخلي.

د جرګې غړیو د بین‌الافغاني خبرواترو د پیل لپاره د ټول‌شموله پلاوي پر ټاکلو، د سولې خبرواترو د پیل او بریا په اړه د نړیوالې ټولنې پر ضمانت او په هېواد کې د تلپاتې سولې پر تامین ټینګار وکړ.

د لویې مشورتي جرګې رییس عبدالله عبدالله په یوه غونډه کې وویل: د کمېټو په منځ کې مخالفت و، خو د کمېټو په جمع‌بندۍ کې مو اختلافونه ونه لیدل، خو بېلابېل نظریات وو. د جرګې ځینو غړیو ویل چې باید مخکې له مخکې یو شرط موجود وي، ځینو ضمانت او د تاوتریخوالی غوښته او ځینو بیا ان د طالب بندیانو د خوشې کولو لپاره د نړیوالو ضمانتونو غوښتنه کوله.

عبدالله په یاده خبري غونډه کې زیاته کړه چې د لویې جرګې له پرېکړې وروسته، درې ورځو ته اړتیا ده چې بندیان خوشې او د سولې خبرې اترې پیل شي. نوموړي وویل چې لومړنۍ خبرې اترې به په قطر کې پیل شي.

ولسمشر محمداشرف غني د لوی اختر په اختریزه وینا کې وویل چې دولت به د پاتې ۴۰۰ طالب بندیانو د خوشې کولو او نه خوشې کولو په اړه لویه مشورتي جرګه راوبلي. په دې جرګه کې د ۳۴ ولایتونو ۳۲۰۰ کسانو چې ۷۰۰ یې ښځینه دي، ګډون کړی دی.

اصلي اړیکې: https://swn.af/pashto/Article.aspx?a=56449

د اصلي پاڼې خلاصول

سلام وطندار په اړه نور ولولئ

وروستي خبرونه:

Loading