بازتاب نیوز

د ولسي جرګې مشر د سولې خبرو دوام کې د اوربند غوښتنه وکړه

٢٦ وږی ١٣٩٩ خبر تلویزیون یک

د ولسي جرګې مشر، میر رحمان رحماني قطر کې د بین الافغاني خبرو په دوام کې د اوربند د رامنځته کیدو غوښتنه وکړه.

ښاغلي رحماني د روانې جګړې له امله د ملکي وګړو پر مرګ ژوبلې اندیښنه وښوده او د جګړې پر دواړو خواوو یې غږ وکړ چې پر اوربند باندې سره سلا شي.

د ولسي جرګې یو شمیر نورو غړو هم د نن ورځې غونډه کې وویل چې طالبانو د سولې خبرو پیلیدو سره د غزني او کندز ولایتونو د سقوط هڅه کوي.

دوی له حکومته غوښتنه وکړه چې د خبرو په دوام کې پوځي اقدام هم وکړي او اجازه ورنه کړي چې طالبان خپلې دغې موخې ته ورسیږي.

د جرګې غړو په حکومت کې د سرپرست وزیرانو د کار پر دوام هم نیوکه وکړه او له حکومته یې وغوښتل چې ژر تر ژره نوماند وزیران د رایې اخیستلو لپاره ولسي جرګې ته ورمعرفي کړي.

د جرګې غړي وایي نوماند وزیران باید په اړوندو وزارتو کې د کار له پيلیدو وړاندې دوی ته واستول شي.

دوی ګواښ وکړ چې که چیرې حکومت د نوماند وزیرانو معرفي کیدو کې ناغیړي وکړي، نو راتلونکې اونۍ به په دې اړه خپله پریکړه اعلان کړي.

د ولسي جرګې د غړو دا نیوکې داسې حال کې مطرح کیږي چې د نن ورځې غونډه کې د استازو دریو کې یوه برخه یې حضور نه درلود.

اصلي اړیکې: http://www.1tvnews.af/ps/news/afghanistan/43163-2020-09-16-10-00-51

د اصلي پاڼې خلاصول

خبر تلویزیون یک په اړه نور ولولئ

وروستي خبرونه:

Loading