بازتاب نیوز

که په ولایتونو کې د ټاکنو دفترونه تړلي پاتې شي، ښايي ټاکنې وځنډیږي

٢٥ وږی ١٣٩٧ آریانا نیوز

د ټاکنو خپلواک کمیسیون ګواښ کوي، که دفترونه یې تړلي پاتې شي، ښايي ټاکنې وځنډيږي.

له پارلماني ټاکنو سره د سیاسي ګوندونو مخالفت له څو میاشتو راهیسې پیل شوی؛ خو اوس تازه د افغانستان لوی ملي ائتلاف په بلخ، هرات او کندهار ولایتونو کې د ټاکنو خپلواک کمیسیون دفترونه تړلي دي.

د ټاکنو خپلواک کمیسیون له حکومت څخه غواړي، چې د دوی د دفترونو او کار کوونکیو امنیت خوندي کړي.

د ټاکنو خپلواک کمیسیون رييس عبدالبدیع صیاد وایي: هغه کسان، چې په مرکز او ولایتونو کې د ټاکنو دفترونه تړي؛ غواړي ټاکنې وځنډوي. د ټاکنو ځنډولو مسوولیت به د هغو کسانو پر غاړه وي، چې د دې ملي بهیر خنډ کیږي.

ګوندونه وېره لري، چې په را روانو ټاکنو کې د درغلیو شونتیا ډېره ده او ادعا کوي؛ کمیسیون داسې تګلارې نلري، چې د درغلیو مخه پرې ونیسي.

د حزب اسلامي ګوند غړی همایون جریر وایي، چې ګوندونه له حکومت سره هیڅ راز مخالفت نلري؛ مونږ د رڼو ټاکنو غوښتونکي یو او غواړو ، چې خپل دغه بهیر روان وساتو.  

شاوخوا پېنځه دېرش سیاسي ګوندونه تور لګوي، چې حکومت سر له اوسه په ټاکنو کې د درغلیو تابیا نیولې ده.

د جمعیت ګوند غړی نور رحمان اخلاقي وایي: تاسې پوهیږئ، چې ګوندونه د پروګرام له مخې پر رڼو ټاکنو ټینګار کوي؛ ځکه، نو  د بایو متریک بهیر کولی شي ټاکنې رڼې کړي.  

د ټاکنو خپلواک کمیسیون د رایه ورکوونکیو د چاڼ کولو په موخه د اته میلیون هغو کسانو معلومات معلوماتي مرکز ته داخل کړي، چې د رایه ورکوونکیو په توګه یې نوملیکنه کړې ده، چې ښايي په دغه شمېر کې سل زره کسان تکراري وي.

دغه راز د ټاکنو خپلواک کمیسیون د یکشنبې په ورځ د سرپل، زابل، پنجشیر او فراه ولایتونو رای ورکوونکي چاڼ کړي او شپږ ویشت زره کسان یې د رایه ورکوونکیو له نوملړ څخه ځکه ایستلي، چې د رایې ورکولو شرایط یې نه وو پوره کړي.

دا په داسې حال کې ده، چې پولیسو ویلي، چې د زور کارولو په ګډون به له هرې ممکنې لارې کوښښ وکړي، چې د ټاکنو خپلواک کمیسیون دفترونه پرانیستي وساتي.

د کورنیو چارو وزارت د ویاند مرستیال نصرت رحیمي وايي، چې په هرات ولایت کې د ټاکنو خپلواک کمیسیون تړل شوی دفتر نن پرانیستل شو او د بلخ او کندهار تړل شوي دفترونه به هم ډېر ژر خلاص شي.

له دې مخکې په کابل کې د ټاکنو خپلواک کمیسیون مرکزي دفتر هم لس ورځې د معترضو کاندیدانو لخوا تړل شوی و.

خبریال علی اصغري

اصلي اړیکې: https://ariananews.af/%DA%A9%D9%87-%D9%BE%D9%87-2/?lang=ps

د اصلي پاڼې خلاصول

آریانا نیوز په اړه نور ولولئ

وروستي خبرونه:

Loading