بازتاب نیوز

قطر ته د ملا برادر تګ او سیاسي پلاوي کې د هغه غړيتوب پر سر اختلاف

٢٣ مرغومی ١٣٩٧ طلوع نیوز

طالبانو ته نږدې سرچینې وايي ملاغني برادر چې په دې وروستیو کې د پاکستان له بنده خوشی شوی د طالبانو ډلې په سیاسي بهیرونو کې د ګډون لپاره قطر ته رسېدلی دی.

خو دغه سرچینې د قطر دفتر په سیاسي پلاوي کې د ملابرادر غړیتوب تراوسه د دې دفتر او طالبانو د مشرتابه ترڅنګ یوه جنجالي موضوع ده.

په همدې حال کې د سولې عالي شورا، د سولې په خبرو اترو کې د ملابرادر ونډه ډېره مهمه بولي او له طالبانو غواړي چې له حکومت سره د خبرو اترو لپاره خپل مرکچي پلاوی مشخص کړي.

د سولې عالي شورا ویاند سید احسان طاهري په دې اړه وویل:«د ملا برادر رول په ځلونو مهم دی او هیله لرو چې ډېر ژر داسې رول ولوبوي چې د مشرتابه په کچه کې یې اعتماد جوړونه رامنځته شي او ډېر ژر خپل مرکچي پلاوی انتخاب کړي.»

د سولې خبرو په بهیر کې د تصمیم نیوونکي پلاوي په جوړښت کې د ملاغني برادر احتمالي شامیلېدو د ولسي جرګې په غړو کې یو لړ هیلې رامنځته کړې دي.

د ولسي جرګې غړی غلام فاروق مجروح څرګنده کړه:«ځکه چې ملابرادر د طالبانو پرمهال هم یو اغېزناک کس و، او اوس هم که‎چېرې د خبرو اترو واک او د طالبانو استازیتوب ولري کولای شي اغېزناک وي.»

خو اجراییه ریاست د سولې په بهیر کې د کسانو رول مهم نه ګڼي او وايي د سولې په بهیر کې بدلون د پاکستان د سیاستونو بدلېدو ته اړتیا لري او د سولې د خبرو په بهیر کې د سیمې او له سیمې اخوا هېوادونو ترمنځ د سیالیو په اړه اندېښنه څرګندوي.

د اجراییه ریاست ویاند مجیب رحیمي وايي:«دا چې له بنده د یوه کس ازادېدل او یا هم بند ته تلل دې وکړای شي دا بهیر بدل کړي زه تر ډېره بریده په دې باور نه یم، د سولې په بهیر کې بدلون د پاکستان په سیاستونو کې بدلون ته اړتیا لري.»

ملاغني برادر د پاکستان په کراچۍ ښار کې د هغه له نیول کېدو مخکې د طالبانو ډلې د پخواني مشر ملاعمر مرستیال و، هغه د طالبانو د واکمنۍ پرمهال په کابل کې د دفاع وزیر مرستیال او د ملاعمر ترڅنګ د طالب ډلې یو بنسټ ایښودونکی بلل کېده. 

اصلي اړیکې: https://www.tolonews.com/index.php/pa/afghanistan/%D9%82%D8%B7%D8%B1-%D8%AA%D9%87-%D8%AF-%D9%85%D9%84%D8%A7-%D8%A8%D8%B1%D8%A7%D8%AF%D8%B1-%D8%AA%DA%AB-%D8%A7%D9%88-%D8%B3%DB%8C%D8%A7%D8%B3%D9%8A-%D9%BE%D9%84%D8%A7%D9%88%D9%8A-%DA%A9%DB%90-%D8%AF-%D9%87%D8%BA%D9%87-%D8%BA%DA%93%D9%8A%D8%AA%D9%88%D8%A8-%D9%BE%D8%B1-%D8%B3%D8%B1-%D8%A7%D8%AE%D8%AA%D9%84%D8%A7%D9%81

د اصلي پاڼې خلاصول

طلوع نیوز په اړه نور ولولئ

وروستي خبرونه:

Loading