بازتاب نیوز

د مولانا فضل الرحمان په دریځ کې له بدلونه د داوودزي هرکلی

٢٦ مرغومی ١٣٩٧ طلوع نیوز

د سولې د سیمه‎ييزې اجماع لپاره د ولسمشر ځانګړی استازی او د سولې عالي شورا د دارالانشا رییس محمد عمر داوودزي نن سې‎شنبې کابل کې په یوې غونډه کې، د افغانستان د سولې په اړه د پاکستان د جمعیت علما اسلام مشر مولانا فضل الرحمان له نوي دریځه هرکلی وکړ او هغه یې د مولانا لخوا لومړنی اقدام وباله.

مولانا فضل الرحمان له پاکستانه د ښاغلي داوودزي له سفر وروسته په خپلو وروستیو څرګندونو کې له طالبانو وغوښتل څو له افغان حکومت سره د سولې خبرو اترو ته کېني.

مولانان فضل الرحمان د امریکا غږ اشنا ټلوېزیون سره په مرکه کې له افغان حکومت سره د طالبانو خبرې دومره مهمې بللې دي هومره چې امریکا سره مهمې دي.

هغه ویلي:«کورني مذاکرات هم ډېر مهم دي دا شان چې له امریکا سره مذاکرات مهم دي، طالبان باید له افغان حکومت سره د خبرو اترو مېز ته کېني.»

دا لومړی ځل دی چې مولانا فضل الرحمان داسې دریځ غوره کړی دی.

ښاغلي داوودزي چې په یوې خبري غونډه کې له پاکستانه د خپل سفر په اړه خبرې کولې، زیاته کړه:«د مولانا صاحب فضل الرحمان وینا مې هم ولیده په مطبوعاتو کې حتماً تاسو هم لیدلې ده، په مجازي نړۍ کې یې ډېر انعکاس پيدا کړ، چې هغه هم انشاالله زموږ د خبرو او لیدو پایله وه حتما له خپل ګوند سره به یې مشوره لرله چې بالاخره راڅرګند شو او خپل دریځ یې روښانه کړه.»

ښاغلي داوودزي د لنډمهاله حکومت په اړه وویل چې طالبان د جګړې ښکېل لوری دی له همدې امله هغوی نه شي کولای د لنډمهاله حکومت غوښتنه وکړي.

هغه زیاته کړه:«فرهنګ د سولې غوښتنې کلتور دی ستونزه د ځینو نوښتونو ستونزه ده او هغه نوښت چې زیاتوالی پيدا کړ بیا نه همغږي هم ورسره وي بیا له ستونزې سره مخ کېږي.»

له بلخوا د ولسمشر د ملي امنیت سلاکار دفتر وايي چې د ملي امنیت شورا سلاکار د سعودي عربستان له چارواکو سره په لیدنه کې د سولې په خبرو اترو کې د افغانانو پر مالکیت ټینګار کړی دی.

د ملي امنیت شورا سلاکار طارق ارین په دې اړه وویل:«په دغو بحثونو کې له ترهګرۍ سره ګډې مبارزې او د افغانانو په مالکیت د سولې خبرو اترو او د دوه او څو اړخیزه همکاریو پياوړتیا شامله وه.»

دم‎ګړۍ د امریکا متحده ایالاتو او منځني ختیځ هېوادونو سربېره، د افغانستان ګاونډي هم د سولې په بهیر کې دخیل شوي او د دغو هېوادونو استازو له طالبانو سره لیدنې لرلې دي. 

اصلي اړیکې: https://www.tolonews.com/index.php/pa/afghanistan/%D8%AF-%D9%85%D9%88%D9%84%D8%A7%D9%86%D8%A7-%D9%81%D8%B6%D9%84-%D8%A7%D9%84%D8%B1%D8%AD%D9%85%D8%A7%D9%86-%D9%BE%D9%87-%D8%AF%D8%B1%DB%8C%DA%81-%DA%A9%DB%90-%D9%84%D9%87-%D8%A8%D8%AF%D9%84%D9%88%D9%86%D9%87-%D8%AF-%D8%AF%D8%A7%D9%88%D9%88%D8%AF%D8%B2%D9%8A-%D9%87%D8%B1%DA%A9%D9%84%DB%8C

د اصلي پاڼې خلاصول

طلوع نیوز په اړه نور ولولئ

وروستي خبرونه:

Loading