بازتاب نیوز

ترکیه: سوریې کې برید به د امریکايي سرتېرو پر وتو اغېزه وکړي

١٧ سلواغه ١٣٩٧ طلوع نیوز

د ترکیې ولسمشر، رجب طیب اردوغان وايي د سوریې په منبج ښار کې برید چې داعش یې مسوولیت واخیست، له دې هېواده به د امریکايي ځواکونو د وتو پر پرېکړې اغېزه وکړي.

د امریکا په مشرۍ ایتلاف ځواکونو په دې برید کې د دوو امریکايي سرتېرو وژل کېدل تایید کړي دي.

د ترکیې ولسمشر ویلي دي:«د هغو مالوماتو له مخې چې زه یې لرم، پنځه امریکايي سرتېري او شل تنه نور کسان وژل شوي دي، د داعش ډلې د برید مسوولیت منلی دی. او دا برید به له سوریې د امریکايي ځواکونو د وتو پر پرېکړې اغېزه وکړي.»

واشنګټن په دې وروستیو کې اعلان وکړ چې خپل سرتېري به له سوریې وباسي او مسکو هم د دې پرېکړې د پلې کېدو په  تمه دی.

د روسیې د بهرنیو چارو وزیر، سرګي لاووروف څرګنده کړې چې د امريکايي ځواکونو له وتو وروسته به د سوریې حکومت د دې هېواد ختیځه برخه هم اداره کړي.

هغه زیاته کړې ده:«موږ د کردانو او د سوریې حکومت د استازو له اړیکو چې دوی د پردیو له مداخلې لیري څنګه کولی شي سره د یووالي ژوند وکړي، ستایو او ملاتړ یې کوو.»

د روسیې د بهرنیو چارو وزیر وايي چې د سوریې موضوع ډېره مهمه ده او راتلونکې اوونۍ به دواړه هېوادونه په مسکو کې پر همدې موضوع خبرې وکړي.

اصلي اړیکې: https://www.tolonews.com/index.php/pa/world/%D8%AA%D8%B1%DA%A9%DB%8C%D9%87-%D8%B3%D9%88%D8%B1%DB%8C%DB%90-%DA%A9%DB%90-%D8%A8%D8%B1%DB%8C%D8%AF-%D8%A8%D9%87-%D8%AF-%D8%A7%D9%85%D8%B1%DB%8C%DA%A9%D8%A7%D9%8A%D9%8A-%D8%B3%D8%B1%D8%AA%DB%90%D8%B1%D9%88-%D9%BE%D8%B1-%D9%88%D8%AA%D9%88-%D8%A7%D8%BA%DB%90%D8%B2%D9%87-%D9%88%DA%A9%DA%93%D9%8A

د اصلي پاڼې خلاصول

طلوع نیوز په اړه نور ولولئ

وروستي خبرونه:

Loading