بازتاب نیوز

د کابل په ګډون شلو ولايتونو کې سيلابونو مرګ ژوبله اړولې

٢٧ وری ١٣٩٨ نن ټکی اسیا

نن ټکی اسيا (سه شنبه، ۲۷ وری، ۱۳۹۸ل): د پلازمينې کابل په ګډون د افغانستان په شلو بيلابيلو ولایتونو کې د ورښتونو او سيلابونو له امله ګڼ شمير خلکو ته مرګ ژوبله اوښتې.

د کابل د ښاروالۍ چارواکي وايي چې د وروستيو ورښتونو له امله په پلازمینه کې دوه کسان وژل شوي او ۳۵ کورونه نړېدلي دي او په راتلونکې کې يې د سيلابونو راوتلو انديښنه ښودلې ده او له پوهنې وزارت څخه يې غوښتي چې د څو ورځو له پاره ښوونځي هم رخصت کړي.

د کابل ښاروال احمد ذکي سرفراز رسنيو ته ويلي دي چې د کابل سيند تر پخوا ډېر ډک شوی او د شاوخوا کورونو د زيانمنېدو احتمال شته دی.

سرفراز ويلي دي چې د وروستيو ورښتونو له امله د کابل سيند داسې څپانده شوی دی چې دواړو لوريو ته نږدې دوکانونه او ميشت ځايونه زيانمنولی شي.

د افغانستان د هوا پېژندنې اداره وايي چې په ځينو ولايتونو کې د دې اوونۍ له پيله ورښتونه پيل شوي دي او ښايي چې دوام وکړي او تر پنځوس ملي مترو پورې باران وشي.

بل لور ته د افغانستان طبيعي پيښو سره د مبارزې وزارت وايي چې د هيواد د مرکز په ګډون شلو ولايتونو کې په سيلابونو کې د وژل شويو شمیر ۱۲۷ ته رسېدلی دی.

ددې وزارت د معلومات له مخې کندهار، هرات او غزني ولايتونه تر نورو ډېر زيان ليدلی دی.

د هرات د والي ویاند جيلاني فرهاد وايي چې په دې ولايت کې له تيرو ۲۴ ساعتونو راهيسې د ورښتونو له امله پنځه تنه وژل

شوي او لس نور ټپيان او اووه تنه ورک شوي دي.

د یادونې وړ ده چې سږ کال د نورو کلونو په نسبت په افغانستان کې زيات ورښتونه وشول چې بزګران ورته خوښ دي خو د سيلابونو له امله ګڼ شمير خلکو په کې خپل ژوند او شتمني له لاسه ورکړل.

اصلي اړیکې: https://www.nunn.asia/143155/%D8%AF-%DA%A9%D8%A7%D8%A8%D9%84-%D9%BE%D9%87-%DA%AB%DA%89%D9%88%D9%86-%D8%B4%D9%84%D9%88-%D9%88%D9%84%D8%A7%D9%8A%D8%AA%D9%88%D9%86%D9%88-%DA%A9%DB%90-%D8%B3%D9%8A%D9%84%D8%A7%D8%A8%D9%88%D9%86%D9%88/

د اصلي پاڼې خلاصول

نن ټکی اسیا په اړه نور ولولئ

وروستي خبرونه:

Loading