بازتاب نیوز

۸ کاري ډلې د قطر په ناسته کې په کومو موضوعاتو بحث او خبرې کوي؟

٢٨ وری ١٣٩٨ د كليد ګروپ

په داسې حال کې چې افغان حکومت د قطر په بين الافغاني کنفرانس کې د ګډون لپاره د سه شنبې په ورځ د ۲۵۰ تنو ګډون کوونکو لېست خپور کړ، خو وسله والو طالبانو دې ته په غبرګون کې د يوې اعلاميې په خپرولو سره ويلي: ((محدود سياسي شخصيتونه او قومي مشران په وروستي لېست کې ځای لري چې يوازې هغوی د قطر په ناسته کې ګډون کوي.))

جمهوري رياست وايي، د ملي يووالي حکومت مشرانو او يو شمېر سياسي شخصيتونو د چهارشنبې په ورځ په يوه ناسته کې د قطر په کنفرانس کې د ګډون کوونکي پلاوي له غړو سره د سولې پروسې د اهميت او د افغانستان له دولت او ملت د باعزته استازولۍ په تړاو خبرې وکړې.

د راپورونو پر بنست د دوحې کنفرانس ګډونوال به په بېلا بېلو کاري ډلو کې له طالبانو او اسلام د افغانستان د دولت د تعريف، د بيان د ازادۍ، د ښځو د حقونو، د ټاکنو او د قدرت د لېږد د څرنګوالي، پر اقتصاد د جګړې د منفي اغېزو او د قضايه، مقننه او اجرايه قوې د څرنګوالي په تړاو بحث او خبرې وکړي.

په همدې حال کې سياسي کارپوهان باور لري چې د دوحې غونډې ګډونوال به د دوی د شمېر د ډېروالي له کبله کنټرول او واحد نظر ونه لري.

د سياسي چارو شنونکی محمد علي جعفري وايي، افغان حکومت نه دی توانېدلی چې په افغانستان کې د ننه يوه واحده اجماع رامنځته کړي او له طالبانو سره خبرې وکړي.

له بل لوري د سياسي چارو کارپوه عادل شاه قريشي بيا وايي، د سولې د خبرو له پيل راهيسې د افغانستان حکومت بې پروګرامه عمل کړی او د قطر د ناستې ګډونوال هم له همغږۍ پرته ټاکل شوي دي.

ټاکل شوې د قطر د سولې ناسته د وري په ۳۰مه نېټه جوړه شي او د دې غونډې ګډونوال په بېلا بېلو ډلو کې د افغان دولت په مديريت بحث او خبرې وکړي او له بحثونو وروسته د غويي مياشتې په لومړۍ نېټه د افغان حکومت او وسله والو طالبانو له لوري يوه ګډه اعلاميه خپره شي.

 

The post ۸ کاري ډلې د قطر په ناسته کې په کومو موضوعاتو بحث او خبرې کوي؟ appeared first on pashto.

اصلي اړیکې: https://tkg.af/pashto/2019/04/17/%DB%B8-%DA%A9%D8%A7%D8%B1%D9%8A-%DA%89%D9%84%DB%90-%D8%AF-%D9%82%D8%B7%D8%B1-%D9%BE%D9%87-%D9%86%D8%A7%D8%B3%D8%AA%D9%87-%DA%A9%DB%90-%D9%BE%D9%87-%DA%A9%D9%88%D9%85%D9%88-%D9%85%D9%88%D8%B6%D9%88/

د اصلي پاڼې خلاصول

د كليد ګروپ په اړه نور ولولئ

وروستي خبرونه:

Loading