بازتاب نیوز

ازادي ستوډيو- د نړۍ مهم خبرونه

٢٥ زمری ١٣٩٧ دازادې اروپا راډیو دازادې اروپا راډیو

سعودي عربستان وايي: د دغه هیواد او کاناډا تر منځ ترینګلی وضعيت به د سعودي د تيلو پر صادراتو اغېز ونکړي. په امریکا او اروپا کې د تودوخې درجې له زیاتېدو سره په ځینو سيمو کې ځنګلونو اور اخیستی. ازادي سټوډیو د شپې په اتو بجو له پېشګام ټلوېزیون مه‌هېروئ

د افغانستان د کرکټ ملي لوبدله د راتلونکو لوبو د لړۍ لپاره تیاري لري

٢٥ زمری ١٣٩٧ دازادې اروپا راډیو دازادې اروپا راډیو

د افغانستان کرکټ بورډ وايي چې ملي لوبدله له آیرلنډ سره د لوبو د لړۍ لپاره بشپړه تیاري لري. افغان لوبډله د ایرلنډ له ملي لوبډلې سره ټولې ۶ لوبې په پام کې لري چې لومړۍ به د راروانې دوشنبې په ورځ وي. د کرکټ بورډ ویاند فریدهوتک تېره شپه له ازادۍ راډیو سره په خبرو کې د دې لوبو جزییات روښانه کړل:  "لومړی به ۳ شل اووریزې لوبې وشي. د دې لوبو پیل به د اګست په ۲۰مه وي، دوهمه لوبه به د اګست په ۲۲ مه او دریمه به په ۲۴ مه وي. له هغه وروسته ۳ یوورځنۍ نړیوالې لوبې په پام کې دي چې د اګست په ۲۷، ۲۹ او ۳۱ نېټو به ترسره شي." د افغانستان ملي لوبډلې دې لوبو ته د تیارۍ په ترڅ کې د انګلینډ له سیمه ایزو کلپونو سره درې تمریناتي لوبې وکړې چې ټولې یې وګټلې. د کرکټ بورډ ویاند وايي، په دې وروستیو کې د تېزو توپ اچوونکو یا بالرانو د پېژندنې لپاره یو پروګرام عملي شوی چې نتیجه یې ډېره مثبته وه. فرید هوتک وویل چې کرکټ بورډ دا ځوانان د راتلونکې لپاره روزي او پانګونه پرې کوي.

جرمني او نیجر اروپا ته د کډوالو په کنټرولو موافقه کړې ده

٢٤ زمری ١٣٩٧ دازادې اروپا راډیو دازادې اروپا راډیو

جرمني او افریقايي هیواد نیجر اروپا ته د کډوالو د څپې په کنټرولو موافقه کړې ده .   د جرمني صدراعظمې انګیلا میرکل پرون ناوخته برلین سره نزدې مسیبرګ ښار کې د نیجر له ولسمشر محمدو ایسوفو سره وکتل او د کډوالو د ستونزې په مخنیوي کې يې ددغه افریقايي هیواد هڅې وستایلې. میرمن میرکل وویل د نیجر ددې هڅو په مقابل کې به جرمني له تروریزم سره په مبارزه کې د نیجرملاتړ او په اړینو سیمو کې به يې پراختیايی کارونه وکړي. نیجر چې له لیبیا او الجزایر سره پولې لري اروپا ته د افریقا له وچې د کډوالو او پناه غوښتونکو د تیریدو اصلي لار ده. اروپايی ټولنې له نیجر سره تر ۲۰۲۰کاله پورې د یو میلیارده یورو مرستې ژمنه کړې ده.

ترکيې د بخښنې د نړیوال سازمان ددفتر د مشر د خوشې کیدو حکم کړی دی

٢٤ زمری ١٣٩٧ دازادې اروپا راډیو دازادې اروپا راډیو

د ترکيې د استنبول ښار یوې محکمې په دې هیواد کې د بخښنې د نړیوال سازمان د محلي دفتر د مشر د خوشې کیدو حکم کړی دی. دا خبره د بخښنې د نړیوال سازمان یا امنستي انټرنشل څیړونکې اندریو ګارډنیر په خپله ټویټر پاڼه لیکلې ده. تنیر کلیچ له تیر یوه کال راهیسې د ترکيي په ازمیر ښار کې د انقرې له سیاسي مخالف فتح الله ګولین سره د همکارۍ په تور زنداني دی. د ترکيي حکومت فتح الله ګولین چې په امریکا کې میشت دی د ۲۰۱۶ کال د ناکامې پوځي کودتا ترشا ګڼي هغه څه چې ګولین يې ردوي. په یوه بل تحول کې پرون د ترکيې یوې محکمې په کور له نظر بندۍ څخه د امریکايي پادري اندریو برانسون د خوشې کولو غوښتنه رد کړه. ترکيي مقامات وايي برانسون له هغو ډلو سره همکاري کړې ده چې د ۲۰۱۶ کال د کودتا په ناکامه هڅه کې يې لاس درلود. د برانسون د نیول کیدو موضوع په دې ورستیو کې د ترکيي او امریکا ترمنځ اړیکې هم ترینګلې کړې.

امریکا پر دریو کمپنیو چې د شمالي کوریا سره مرسته کوي،بندیزونه ولګول

٢٤ زمری ١٣٩٧ دازادې اروپا راډیو دازادې اروپا راډیو

متحده ایالاتو پر دریو بهرنیو کمپنیو چې د امریکايي مقاماتو په خبره د شمالي کوریا له اټومي پروګرام سره مرسته کوي ،بندیزونه ولګول.   د امریکا د خزانې وزارت پرون وویل ددغو دریو باروړونکو کمپنیو پر ضد چې په چین ،سینګاپور او روسیه کې میشت دي ګامونه اخلي. ددې پریکړې له مخې په متحده ایالاتو کې ددې کمپنیو پانګې بندیږي او امریکايي وګړي نشي کولی له هغوي سره سوداګري وکړي. که څه هم واشنګټن له پیونګ یونګ سره مستقیمې خبرې پیل کړي خو بیا يې هم د موجودو نړیوالو بندیزونو د عملي کولو له لارې پر شمالي کوریا خپلوفشارونو ته دوام ورکړی دی. متحده ایالات غواړي چې ددې بندیزونو په وسیله شمالي کوریا اړباسي چې خپل اټومي او د لرې واټن ویشتونکو میزایلو پروګرام ختم کړي.

یوناما:غزني ته د بشري مرستو د رسیدو زمینه برابره شوې ده

٢٤ زمری ١٣٩٧ دازادې اروپا راډیو دازادې اروپا راډیو

په کابل کې د ملګرو ملتونو دفتر وايي د غزني ښار مرکزي برخې اوس امن دی او دې ولایت ته د تازه دمه امنیتي ځواکونو په رسیدو د وسله والو پر ضد تصفیوي عملیات پراخ شوي دي.   یوناما پرون په یوه بیان کې وویل د غزني ښار په مرکز کې د وضعیت په ښه کیدو دې ښار ته د بشري مرستو رسیدو ته زمینه برابره کړې ده. خو ملګري ملتونه وايي د لارو بندښت او امنیتي ګواښونه بیا هم د بشري مرستو بهیر له خنډ سره مخ کولی شي. ولسمشر محمد اشرف غني پرون په خپلو څرګندونو کې د غزني ښار څلور ورځنۍ جګړه یو ناورین وباله او وویل چې غزني ته د بیړنیو مرستو د رسولو لپاره یوجامع پلان جوړ شوی دی چې په پوره همغږۍ به عملي شي.

په هلمند کي د مخالفانو یوه ډله د سولې له پروسې سره یو ځای شوه

٢٤ زمری ١٣٩٧ دازادې اروپا راډیو دازادې اروپا راډیو

د هلمند چارواکي وايی د ملا لعل محمد په مشرۍ د دولت د وسله والو مخالفانو یوه اته کسیزه ډله پرون د سولې له پروسې سره یو ځای شوه.   د هلمند د والي دفتر په یوه بیان کې ددې وسله والو د مشر ملا لعل محمد په حواله ویلي چې دوي له تیرو ۱۵ کلونو راهیسې د دولت پر ضد جنګیدل او اوس له خپلو کړونو پښیمانه دي. د سولې له پروسې سره یو ځای شویو دې وسله والو ویلي دي چې د افغان دولت د وسله والو مخالفانو د جګړې قومنده د پاکستان په لاس کې ده. د هلمند والي ژمنه کړې ده چې د سولې له پروسې سره یو ځای کیدونکي وسله وال به مصئونه وي او دولت به د هغوي په ژوند کې د مثبتو بدلونونو په رواستو کې همکاري وکړي.

تر لوی اختر مخکې د متقاعدینو پاتې تنخواګانې ورکول کیږي

٢٤ زمری ١٣٩٧ دازادې اروپا راډیو دازادې اروپا راډیو

د متقاعدینو د خزانې د ریاست مشر وايي هڅه کوي چې تر لوی اختر مخکې د متقاعدینو پاتې تنخواګانې هم ورکړي.   ګل محمد منتظر پرون ازادۍ راډیو ته وویل مالي وزارت د متقاعدینو د تنخواګانو لپاره د غوښتل شویو پیسو یوه برخه منظوره کړې ده . " که خدای ته منظوره وه هڅه کوو چې تر اختر مخکې دوه میلیارده ځانګړې شوې افغانی مصرف کړو .هڅه کوو چې تر راتلونکې یکشنبې یا دوشنبه د متقاعدینو بانکي حسابونو ته پیسې ورسیږي." نوموړي وویل د ولسمشر د سپارښتنې له مخې به ډیر ژر د متقاعدینو خزانه په یوه ځانګړي صندوق بدله شي چې د متقاعدینو تنخواګانې به مستقیما په کې ټولیږي. له ازادۍ رادیو سره په تلیفوني تماسونو کې لسګونو متقاعدینو په خپلو تنخواګانو کې له ځنډ نه په وار وار شکایتونه کړي دي.

هاشمی : ددې امکان نشته چې په غزني کې د ولسي جرګې انتخابات وشي

٢٣ زمری ١٣٩٧ دازادې اروپا راډیو دازادې اروپا راډیو

  د افغانستان د انتخاباتو خپلواک کمیسیون وایي، د دې امکان نشته چې په غزني کې دې د ولسي جرګې او د ولسوالیو د شوراګانو انتخابات وشي ځکه د دغو انتخاباتو لپاره د تیاري لازم وخت له لاسه وتلی دی.   د دې کمیسیون غړي او ویاند سید حفیظ الله هاشمي تیره ورځ ناوخته ازادي راډیو ته وویل چې په غزني کې د انتخاباتو په اړه یې وړاندیز د امنیت شورا ځانګړې کمیټې ته وړاندې کړی او د هغې د پریکړې په تمه دي.  تردې مخکې د انتخاباتو کمیسیون د ځینو ستونزو له امله دغې کمیټې ته د ولسوالیو د شوراګانو د ځنډیډ وړاندیز هم کړی و. ښاغلي هاشمي وویل چې کمیټې پردې مسئلې بحث کړی او تراوسه یې وروستۍ پریکړه نده کړې. په غزني کې چې ښاریې په وروستیو څو ورځو کې د وسله والو طالبانو او افغان امنیتي ځواکونو د جګړې په ډګر بدل شوی و، د خلکو د اعتراضونو له مخې د انتخاباتود نوم لیکنې پروسه هیڅ ترسره نشوه. ټاکل شوې چې د ولسي جرګې او د ولسوالیو د شوراګانو انتخابات د تلي یا میزان په ۲۸ نیټه ترسره شي.

اجرائیه ریاست: په غزني کې له زیانمن شویو خلکو سره بیړنۍ مرستې کیږي

٢٣ زمری ١٣٩٧ دازادې اروپا راډیو دازادې اروپا راډیو

د افغانستان د حکومت اجرائیه ریاست په غزني کې د وروستیو جګړو له امله له زیانمن شویو خلکو سره د عاجلو مرستو د لړۍ د پیلیدو خبرورکوي.   د حکومت د اجراییه ریاست مرستیال ویاند امید میثم تیره ورځ ناوخته ازادي راډیو ته وویل چې اصظراري حالاتو د کمیټې په غونډه کې د اړوندو ادارو او وزارتونو مسولیتونو ته اجرائیه ریس عبدالله عبدالله دنده وسپارله چې اړوخلکو ته سمدستي بیړنۍ مرستې ورسوي.   "همدا اوس چې له تاسو سره خبرې کوم ښایي پنځه سوه کورنیو ته په غزني کې خوراکي مواد رسیدلي وي. پرون هم د هوا له لارې یو روغتیایي ټیم د ډاګترانو اوروغتیایي موادو سره غزني ته استول شوی و. د غزني د اوسیدونکو لپاره د خیمې او د نورو د اړتیا وړموادو په برخه کې نن اجراات وشول او سبا به هم په دې برخه کې نوراقدامات وشي." په غرني کې د ورستیوجګړو له امله ویل کیږي په سلګونو کورنۍ کډه کولو ته اړشوي او زرګونو نورې یې عاجلو مرسته اړتیا لري. د افغاني سرې میاشتې ټولنې هم پرون وویل چې د غزني روغتون ته یې روغتیایي شاوخوا پنځه سوه بستې او دوه سوه تابوتونه استولي دي. 

په ایتالیا کي شاوخوا دیرش تنه د یو پُل د نړیدو له امله ووژل شول

٢٣ زمری ١٣٩٧ دازادې اروپا راډیو دازادې اروپا راډیو

د ایتالیا چارواکي وایي شاوخوا دیرش تنه هغه مهال ووژل شول چې د ایتالیا او فرانسې ترمنځ پرلویه لاره یومهم پل د ناڅاپي طوفان له امله ونړید او موټرونه ترې ۴۵ متره لاندې ولویدل.   د ایتالیا د صدراعظم مرستیال ماتیو سلویني د سې شنبې په ورځ خبریالانو ته وویل چې شاوخوا دیرش تنه مړه شوي او یو زیات شمیرنور سخت ټپیان دي. د ایتالیا د بندري ښار جینوا په یوه صنعتي سیمه کې د موراندي د پله یوه لویه برخه پرون غرمه مهال ونړیده. د پیښې له ځایه تصویرونه ښیي چې د پله د دو برخو ترمنځ یوه لویه خالي فضا لیدل کیږي. د ایتالیا د ملکي چارو د ادارې مشر انګیلو بوریلي Angelo Borrelli وویل، د پله په نړیدلې برخه کې چې اتیا متره اوږده وه دیرش، پنځه دیرش موټر او دری لویې لارې روان و. د اطفایې کارکونکو وویل چې دوه تنه یې ترخاورو خښتو لاندې له موټرو ژوندي را ایستلي دي.

اروپایي ټولنې په آزربایجان کې د الګارمحمدوف آزادی ستایلی

٢٣ زمری ١٣٩٧ دازادې اروپا راډیو دازادې اروپا راډیو

اروپایي ټولنې د آزربایجان د هغې محکمې اقدام ستایلی چې د حکومت یوسیاسي مخالف مشر الګارمحمدوف یې آزاد کړی دی.   نوموړی چې په اوو کلونو بند محکوم شوی و، په زندان کې له څه باندې پنځو کلونو بند تیرولو وروسته پرون آزاد شو. د اروپایي ټولنې د بهرني سیاست د مشرې فیدریکا موګیرینې یوه ویاند وویل چې د محمدوف قضیه یې د اروپا له شورا سره یوځای تعبیب کړې ده. محمدوف د ۲۰۱۳ کال په فبرورۍ کې د باکو په شمال لویدیځ د اسماعیلیه په ښارکې د ناارامیو په تنظیمولو کې د لاس لرلو په تورنیول شوی و. خو هغه ویلي وچې د زنداني کیدو ترشاه یې سیاسي انګیزه پرته ده.

فیلیپوګراندي به د سوریې د وضعیت د څیړلو لپاره هغه هیواد ته ولاړشي

٢٣ زمری ١٣٩٧ دازادې اروپا راډیو دازادې اروپا راډیو

لبنان د کډوالو په چارو کې د ملګروملتونو د ادارې د مشرفیلیپو ګراندې وروستۍ څرګندونې ردکړې.   ګراندې د دوشنبې په ورځ ویلي چې لاوختي ده چې له لبنان څخه بیرته خپل هیواد ته په ډله ییزه توګه د سوریایي کډوالو پرستنولو بحث وشي ځکه د ده په باورتراوسه د سوریې وضعیت ډیرخطرناکه دی. د لبنان د بهرنیو چارو وزارت د سې شنبې په ورځ وویل چې د سوریې اکثره ښارونه او ولایتونه اوس امن دي. په اوس وخت کې له یوملیون زیات سوریایان په لبنان کې اوسي. فیلیپوګراندي ویلي چې څو ورځې وروسته به د سوریې د وضعیت د څیړلو لپاره هغه هیواد ته ولاړشي.

د سولې د ولسي حرکت غړي نن د کابل په قره باغ ولسوالې کې غونډه کوي

٢٣ زمری ١٣٩٧ دازادې اروپا راډیو دازادې اروپا راډیو

د سولې د ولسي حرکت غړي بلخ ته په لاره، نن د کابل ولایت په قره باغ کې په یوه غونډه کې ګډون کوي.   د دې حرکت ویاند بسم الله وطندوست تیره ورځ ناوخته ازادي ته راډیو ته وویل چې د قره باغ ولسوالۍ قومي مشرانو، دیني عالمانو ورته د دې غونډې تیاری نیولی دی.   ښاغلي وطندوست وویل چې قومي مشرانو ورسره دا ژمنه هم کړې چې ترغونډې وروسته به په سلګونو کسان له دوی سره ترپروانه پورې پلي ځي. د ده په ګډون د دې حرکت د شپیتو غړو له جملې پنځه ویشت یې پښې لوڅي بلخ ته ځي چې دغه مزل به د ده په وینا ښایي دوه میاشتې وخت ونیسي.

له ازادۍ سټوډیو څخه د نړۍ تازه پېښې

٨ ليندی -٦٢٣ دازادې اروپا راډیو دازادې اروپا راډیو

د پاکستان د بهرنیو چارو نوي وزير شاه محمود قريشي د افغانستان په ګډون د پاکستان له ګاونډيانو سره د ښو اړیکو غوښتنه کړې ده. د امریکا د ملي امنيت سلاکار جان بولټن د ايران اټومي موافقه ناوړه بللې ده. ازادي سټوډیو د شپې په اتو بجو له پیشګام ټلویزیون وګورئ.